做人最緊要開心，同珍惜𠵱家擁有嘅一切，查實賭波都係尋開心，唔通真係靠賭發達咩？自己分析完後估中個結果，最大樂趣莫過於此。
大家揸住呢份AA4，上身係我同石兄主打嘅西甲、意甲，下身嘅〈救生圈〉又係我哋包辦，希望全版由頭贏到尾，幫到暫時失業嘅球迷。上期我推介中咗兩場冷門，其一係阿積士3.1倍「半和」，其二係富咸2:0勝西布朗嘅7倍波膽，成績算係唔錯。
華倫小勝夠數
食住個旺勢，頭關又係先向和波埋手，要法甲賽事，羅連安特作客波爾多頂得住唔輸，開3.5倍D及5.5倍[和/和]。羅連安特近期不敗率算高，尤其作客7場未輸過，功績有和里昂及里爾1:1、更試過3:2贏馬賽，唔好忘記對手全部係前列分子。波爾多話就話排第5，但為咗應付重開嘅歐協盃而影響聯賽戰績，上周中32強次回合強陣下負加拉塔沙雷3:4，搏完一輪點都要回氣，和波抵買。
推介點少得地盤西甲，華倫西亞今周迎華拉度列，相信會贏得幾辛苦，事關首席射手韋拿要停賽，要靠晒後上嘅大衛施華同桑馬達，應該小勝開3.7倍「和」機會最大，波膽要2:1。
葡超波一向旺「細」膽，馬里迪莫迎塞圖巴爾個「細」得1.45倍，買嚟都嘥氣；我就進取啲，揀3.3倍嘅「1球」，畢竟成個葡超今季開「1球」比率係第2多。文：畢傑