舊Mini車主勁錫車，入元朗車場、上網Bid嘢，務求搵靚靚原裝件，執番四正架車。新MINI車齡夠新無乜好執，車主轉玩改Outlook，拉花噴公仔乜都有，淨色一樣有得玩，最新潮興噴水晶油，之前興過一輪嘅珍珠白、超令蠟統統要行埋一面，歌星張苡澂大讚：「噴完成架車好似施華洛世奇上身咁閃，搶硬收視呀。」
記者：徐影龍
攝影：林栢鈞
Model：張苡澂
扮靚靚
噴油貴三倍
翻新公司DreamColor兼MINICooper車主Davy，最鍾意改呢樣改嗰樣，心愛MINI一樣走唔甩，未講到底架車總共改咗幾多樣嘢之前，先睇家陣越嚟越多人玩嘅水晶油先。跟水晶蠟有別，水晶油真係有水晶喺入面，不過磨到好似珍珠末咁幼細，一噴完，等於將架車嘅原本顏色披上一層閃令令銀衣，喺底色上透出陣陣閃光。日光日白睇唔多覺眼，但一入夜就係你世界，街燈、車燈、招牌燈，全部打晒落你架車車身，無數咁多粒水晶粉全部反射閃光，就算今時今日尹光着住珠片衫，喺彌敦道邊行邊唱歌，都一定唔夠呢架水晶MINI咁搶眼。
Davy話一般改裝公司只用普通水晶粉，顆粒較粗兼會凸起，但佢哋就用高一檔貨色，水晶粉特登喺美國訂返嚟，最後再打一層最新防花力架上面，成架車即時立立令滑不留手。
價錢呢？老實唔算平，水晶油同力架，連工包料盛惠$25,000，比一般全車噴油貴三倍，不過二十幾萬買架MINI，唔爭在畀多一成幫佢扮靚靚啦。
乜都改
當辦畀客睇
Davy落手改呢架MINI時，越加越多嘢，全車型仔包圍已經$25,000，四條19"合金軨又$15,000，頭轆一對Bambo鮑魚再加$18,000，專門改MINI嘅AC尾喉要$5,000，仲有內櫳改色、DVD音響系統連LCD、腳掣加藍光燈等，差不多買到半架Cooper。最貴係車頂，特別噴上由日本訂番嚟、行內稱變色龍嘅油，唔同時間（色溫），唔同角度睇，可以變成黑、紫、啡同綠色，招搖度唔輸蝕得過水晶油，車頂範圍唔大但花費同樣要$25,000，好彩MINI車身低，路人甲乙丙行過都保證睇到，大牛龜車種唔噴好過。
其實呢架車只作DreamColor生招牌之用，畀客睇吓成品有幾吸引，Davy話佢哋最出名玩局部修飾，好似舊車最常出現嘅皮椅磨蝕、泵把揩花等，都有辦法整到新嘅一樣，試過有客人揸架開篷車嚟，Davy都可以將軟篷噴上另一隻色，獨有手藝，全程毋須拆件一樣噴得掂，對於勢必係黑色嘅軟篷嚟講，換隻新顏色平過換新車喇。
查詢：DreamColor（28864422）
地址：筲箕灣東大街15號B地下