身為香港衞生政策揸fit人嘅周一嶽，原來少年時候都曾經沉迷於吞雲吐霧。噚日佢自爆14歲就試第一口煙，當年讀中三時，因為鍾意睇西部牛仔電影，覺得吸煙好有型，就咁導佢升仙，點知吸煙兩、三個月後被老竇發現，即時經濟封鎖，警告佢「有錢食煙即係唔使咁多零用錢」，為免遭扣減零用錢，佢隨即戒煙。
到70年代去歐洲留學，由於同學多數係煙民，周一嶽為扮熟再次食煙，「以前啲醫院休息室分吸煙同唔吸煙，唔吸煙啲房時時都冇人，要社交就要去吸煙房。」煙齡維持咗一、兩年，返港後仲有食，後來自覺唔健康就戒甩，佢自誇戒煙全靠意志，「一粒藥都冇食過。」