小小超專食大茶飯人所共知，原來佢亦十分嘴尖，食得豪不特止，而且唔嫩唔食。唓！大家有眼睇啦。唔係呀，今次唔係講嗰筆，佢真係最嫩嗰啲先食㗎。
響螺只食最靚兩片
上環有間老牌潮州菜館，係明星食肆富豪飯堂，銀行家寶哥哥係常客，星爺成日同女友于文鳳去撐枱腳，小小超都不時幫襯，雖則8號仔近排新聞多，減薪、裁員、私有化種票疑雲經常上頭條，員工、小股東睇到咬牙切齒，然而無礙小小超品嚐美食心情，有個熟客同八方講，仍然不時見到佢上門幫襯。
呢位熟客話，小小超多數單拖去食飯，坐低唔使多講，一碟青菜同堂灼響螺，咁就一餐。呢間潮州老店賣嘅都係揀手靚嘢，隻隻響螺都份量十足，侍應扑爛個殼起出螺肉，隨即一分為三，頭、尾放埋一邊，只係切中間最嫩兩片灼熟上碟。
正所謂少食多滋味，獨食唔怕肥，小小超食完兩塊螺片，夾埋碟菜，就起身走人，至於張最少三千幾蚊嘅賬單，唔使佢畀錢嘅，寄去公司自然有人找數。小小超係潮州人，當然精通潮州美食之道，不過熟客話，反而唔多見佢伯爺嚟幫襯，唔通兩仔爺口味都有代溝？
八方問過一啲食家，有人話食灼響螺，一般都唔食頭尾，因為灼熟後好韌，所以一隻大響螺，最多都係切到幾片白灼，只食最嫩、最大兩片，確係非一般人享受。
英文財經網攻兩岸
灼螺片喺小小超眼中，可能只係頭盤，都係大茶飯先啱佢胃口，彭博噚日引述知情人士稱，小小超計劃同內地著名雜誌《財經》合作，推出英文財經新聞網站，新網站以兩岸三地財經消息為主，最快今年底前出街，𠵱家正組班招聘人手。
暫時未知呢個新網站規模同業務模式，是否收費、如何收費亦未有細節，由於小小超旗下有《信報》同now新聞台，一般估計《財經》日後可以透過更多渠道接觸更多讀者，尤其係外國用家。業內人士認為財經新聞網站，喺中國大有可為。
《信報》早前亦已推出網站，據講新財經網站同《信報》無關，《信報》暫時亦唔會透過新網站北上，因為新網站以英文用家為主。
mailto:[email protected]