今年7.1應該仲有得遊行，白鴿黨幾個議員提早熱身，今日參加綠色力量舉辦嘅環島行，李永達最有信心，報名行足全程50公里，何俊仁、甘乃威及卿姐等人，量力而為參加半程25公里或10公里就算。咁呢啲做善事嘅嘢，講心啫，唔係真係要鬥腳骨力。
幾個人體能各有不同，達仔話目標係幾個人合共可以喺20小時12分鐘內完成路程，象徵一步一步爭取2012年普選。據大會時限，全程必須在16小時內行畢，半程時限10小時，10公里要5小時行完，八方都希望佢哋達成目標，否則遲一分鐘就即係普選遲一年，遲一個鐘頭就要等多一個世紀，香港普選時間表靠晒佢哋，真係好牙煙。