本地粵劇界近日好戲連場，並非台上大老倌唱大戲，而係台下響晒鑼鼓做大龍鳳。繼阿姐炮轟林鄭益洋人後，今次輪到民政局德成局長查篤撐，怒目質問公民黨陳淑莊，「在新光續租問題上跑到台前，（陳淑莊）到底扮演甚麼角色？」
為新光事件打筆戰
事緣陳淑莊前日喺報章撰文，批評政府懶理粵劇死活，多年來提供唔到足夠表演場地，更差啲搞到新光續租不成。八方聽聞德成局長睇完篇文，氣上心頭，隨即寫文章逐點反駁，親自掛帥同陳淑莊打筆戰。德成局長篇文噚日出街，未睇晒都聞到火藥味十足，其實都唔使奇怪，既然德成局長有斥責陳太忽然民生、忽然民主往績，對住陳淑莊更唔會留手，質問：「陳議員對續約一事到底起過何種作用？」
之不過德成局長今次蝕章，事關佢指陳淑莊曾講過新光業主以前收平租勁蝕，質疑陳究竟係幫業主定幫粵劇界，查實呢番話唔係陳淑莊講，而係電台節目主持人偉論，德成局長收錯料，陳淑莊都唔客氣，發聲明指德成局長評論子虛烏有，令人摸不着頭腦。打筆戰可以慢慢講道理，至於港府對粵劇支持是否足夠，八方相信唔使拗，已有公論。