想知散戶入市態度活躍與否，除了淨睇股市成交外，有時親身到證券行聽一聽多唔多電話盤打入來買賣，即知大概情況。星俠每日都到證券行炒股，昨日坐足大半天，完全聽唔到負責落盤嗰位經紀案前電話有響過！真係好耐未試過靜到咁離譜。
點解靜成咁？市場人士觀望滙控（005）下周一公佈業績，其成績表好壞將拖動港股出現突破，雖然唔知爆上定爆落，但散戶亦寧願暫時睇多過炒。
東航試底機會高
好耐無炒過航空股，內地傳媒報道東方航空（670）的70億元人民幣注資方案以98%以上高票通過，因此即管睇睇有無異動。
東航昨收報1.04元，無升跌，不過從走勢圖可見，股價正受制於幾條主要移動平均線。東航去年12月初曾爆發裂口急升，從走勢判斷，股價已正開始回補該上升裂口，故此仍暫難睇好，料後市將反覆下試52周低位0.65元，不宜沾手。
在金融海嘯冲擊之下，航空業遭受客源劇減的嚴重打擊，油價雖由高位大幅回落，但弊在燃油對冲令不少航空企業焦頭爛額，東航在對冲方面亦有損手，目前難有藉口睇好，行業環境仍複雜，航空股還是少炒為上。
方星俠