雖然聯賽尚有3個月，但有時球隊為升班為保命，已去到場場當「NBA季後賽」踢嘅處境，今次我重心冷選仍是英冠包尾大幡查爾頓，作客爆冷贏今屆異軍史雲斯，開5.1倍冷W。
小弟有時唔想生活太顛倒，除歐聯及阿仙奴嘅球賽外，好難迫使自己晚晚收工仲要捱夜睇波；反而朝早嘅NBA直播仲精采，我早在去年12月嘅專欄說過，好欣賞爵士教練史龍，教20多年未捧一個總冠軍未炒，好欣賞佢哋隊波早前天殘地缺，但替補嘅後生仔仍打出彩虹；現在班主將全部無傷病可復出，戰力更強，眾將表示餘下嘅常規賽會場場當季後賽打，誓要爭取更高排名，有利將來打季後賽。
列斯聯炒得起「索普」
回到足球，今次主題查爾頓，亦去到不容再失之境況，同病傷憐的修咸頓上仗失驚無神贏普雷斯頓，今次查爾頓作客去到史雲斯，肯定被一致看淡；但班波近期已開始止瀉，近5戰搶到7分，目前仍求場場一分就神仙難救；而對手中場起碼有3名主將倦勤，而周中在缺後勁下被富咸踢出足總盃，耗力兼唔「夫添」，今場有輸波危機。
至於波膽過關，上次中阿爾克馬爾2:0，即已連中3期，可惜未過到關，今次捧有入球機器碧福特復出的列斯聯，主場大炒斯肯索普，繼續向升班路奮戰；串射荷甲「1哥」阿爾克馬爾，贏有攻力嘅格羅寧根2:1、3:1。
文：蘋果波神