好想飛2：牛奶搽身脆卜卜

乳豬LechonBaboyProfile
性別：女
年齡：1.5
興趣：食、玩、瞓。

完美乳豬進化論

我係LechonBaboy小乳豬，年輕嘅我哋，5個月至1歲最皮光肉滑，這時候拿來做燒乳豬就最好味，一隻細細隻18kg的燒乳豬仔平均每隻三千幾披索，約$100一公斤啦。我哋要食肥自己，但又唔可以太肥，要做吓運動至半肥瘦，體態才最完美喇！如果係來自馬尼拉北部Pangasinan同Tuguegarao野生豬仔就更加有肉質保證，𠵱家好多農民都仲依靠售賣野生豬維生。可惜，出生農場嘅我細細個時好快就超磅，終於等到今日歲幾牛龜咁大隻先賣得出。

■Mila的燒豬場是LeLoma區內最大，一字排開好有氣勢！

300年燒豬法

廣東人燒豬已有超過二千年歷史，菲律賓則約只有三百幾年，祖先係宿霧。講香口爽脆，當然不及廣東人的燒豬法，但勝在肉汁多又香滑，咬落又軟又厚。以前人們會在我哋肚腩裏塞豆醬、香草、蒜、青葱、醋等，內臟就留起切碎，加麵包糠、糖、黑胡椒等煮成醬汁。後來，可能被中國同西班牙影響，才學廣東人在豬身上塗牛奶，加鹽同黑胡椒，令豬仔燒一個鐘後就變金黃，皮脆肉靚。

■拆下來的豬腸還會即炸成Bituka小食。

■周街都見人這樣拖住隻豬周圍行。

■調味料Brine（粉紅色）跟Brague（啡色），為Bulalo精華。

■餐廳裏特別多一家大小來Sentro1771吃飯。

■玻璃廚房內，師傅斬不停。

■將雜菜都倒到煲裏一鑊熟，是Sinigang的特色。

爭入名門

菲律賓第一間燒乳豬店，係由名叫Tomas嘅阿伯開，現在變成專賣各種燒乳豬醬料的公司，你去超市就會見到佢老人家嘅貨，成排咁放在架上。六十年代尾，白手興家的Serafin同AntoninaCesario在LaLoma有家小店，1968年小女兒出世後，佢哋將店名改做Mila送畀個女。37年後，在同一區QuezonCity已開了8間分店，更令在馬尼拉同QuezonCity之間那條小小的LaLoma街火紅起來，滿街滿巷都係燒乳豬。所以你一講LechonBaboy，的士司機會自動車你去Loma區。在擺豬街Calavite，燒豬好似花牌咁一字排開，市內無論大酒店、街邊攤還是屋企都要食豬，都在這兒訂貨。我哋隻隻豬都好似想入名校一樣，希望自己可以被挑選到這裏變身上等燒豬，因為身價倍增，入名門豪宅做主角都靠今鋪喇！

■Mila乳豬店已開了8間分店。

■看這乳豬的肉汁多，每盤約$20。

■像北京填鴨，用香草春卷皮包着烤乳豬同食，不過塊皮好硬呀！

Mila'sLechonRestaurant&CateringServices
地址：69CalaviteSt.,LaLoma,QuezonCity,Manila
網頁： http://www.milas-lechon.com

Fusion菲新菜

除了烤乳豬必食，我個friend阿牛主打的Bulalo，都係傳統地道菜。Bulalo即牛骨湯，一大嚿牛骨還得加鹽醃製7日，用時再煲6、7個鐘，令骨髓裏的精華全逼出來。這家堪稱馬尼拉首家modern菲律賓菜的餐廳Sentro1771，還將之改良，牛骨砍到極碎，一來賣相靚仔，二來骨髓更易溶入湯汁裏。另外，還有好似冬蔭功咁酸的Sinigang，可以煮魚、豬肉或牛肉等，內有羅望子，青胡椒同洋葱，每次飲都酸到頂唔順。

■熊熊烈火裏的燒牛肉，快熟又香口。

■菲律賓人最愛的飲品Holulu，裏面有10種以上配料，超甜！$18

■將傳統的Bulalo改良，無骨好易食。約$40

■傳統牛肉湯Sinigang，味道很酸。約$32

Sentro1771
地址：2/LGreenbelt3,AyalaCenter,MakatiCity
電話：（63）2-7573940

出門提一提

簽證：持特區護照、BNO均毋須簽證。查詢：28238500（菲律賓旅遊局）

機票：宿霧太平洋航空來回香港、馬尼拉經濟客位，票價約$1,325起。查詢： http://www.cebupacificair.com（宿霧太平洋航空）

旅行團：五日四夜潛水之旅，中間三日每日潛兩次，團費$4,880起。查詢： http://www.sunnseaholidays.com（SunNSeaHolidays）

貨幣：1港元約兌6.29披索（文中價錢已折算港元）

電壓：220V，兩扁腳插座

查詢： http://www.wowphilippines.com.hk（菲律賓旅遊部）