老牌報章《成報》之前一兩年屢傳財困，員工欠薪、被拖強積金供款時有所聞，甚至俾專欄作家追稿費，但原來《成報》老闆、名譽主席楊家誠好闊佬，前晚佢喺紅磡某酒店擺壽酒，筵開十幾席，廣邀親朋戚友、旗下公司同《成報》多個部門主管到場。
據親歷其境人士透露，當晚主人家十分高興，率先拎幾十萬出嚟抽獎，後來又叫到賀富豪科水，結果竟然俾佢鋤到成百萬獎金，娛圈名人Ba叔陳達志更送出兩隻各值30幾萬元嘅名錶助興。呢個超級大抽獎，據稱全場七成人有錢落袋，安慰獎都有2,000蚊，大獎25萬元則由楊家誠旗下公司職員奪得，《成報》有人攞到15萬元，編採部一名高層抽到9萬蚊，楊老闆後來加碼，冇中獎者位位派1萬蚊，楊生派錢後同員工講：「唔好辭工呀！」