好想飛1：玻璃水尋寶

香港人對菲律賓應該好認識，但其實又唔係好熟。究竟去菲律賓有咩嘢係必做呢？當然離不開潛水和美食啦，今次就等呢兩個菲律賓朋友─狗狗Bowry和LechonBaboy乳豬仔，帶大家去搵最靚的海和食最好味的食物。

記者、攝影：陳慧敏
鳴謝：菲律賓旅遊局、SunNSeaHolidays

狗狗BowryProfile

性別：女
年齡：2
興趣：同主人吹吹風又吹吹水。

天下無賊

我是今日的領隊Bowry，金毛尋回犬一隻，這裏是馬尼拉的邊緣呂宋最南端，Anilao。好多馬尼拉人，周六、日開兩小時車到這裏潛水。由我住的resort沿公路行個半鐘，除了車、羊、鄉村小學、民房和海外，甚麼也沒有。來這兒，你可避世、蜜月乜都得。
我主人Oliver，潛水發燒友一名，他有間新resort在去年6月開業，共10間房，中間一株榆樹，伸開的枝葉將整個resort同泳池覆蓋。房間設計簡單有型，最重要係有冷氣！廚師Chito先生煮嘢食好拿手，特別是焦糖布丁，所以去時記得食番個！所有房間都無門鎖，因為這兒地方太平，村子細，人單純，絕無賊匪；加上resort內有我Bowry守門口，根本唔使擔心。

■整個resort就被一棵樹覆蓋，係咪好浪漫呢？

■同我的DiverMasterOliver出海，健康又愉快。

■10間客房有17個員工服侍你，屬五星級待遇。

尋海底十字架

菲律賓除芒果多外，小島仲多！七千多個小島，淨係Anilao都有三、四十個潛水點。因為前總統是天主教徒，也喜歡潛水，所以其中一個潛點有海底十字架同聖母像，附近又有迷你鐵架城堡。好多潛過水嘅人都話那兒的魚特別大條，有手掌大的小丑魚、兩斤重的雞泡魚，仲有七彩海蛞蝓，我睇過Oliver影嘅相，真係好精采。附近也是鯨鯊出沒的地點，上年年尾，就有條鯨鯊在resort前面跳起，勁過睇WaterWorld海豚頂波波呀。

AcaciaDiveResort
地址：Anilao,Mabini,Batangas
價錢：每晚約$820起
網頁： http://acaciadive.wordpress.com/

潛水好過媾女

沒有客人的日子，Oliver和我都好想回馬尼拉，所以客人一走，我哋就留在馬尼拉大宅裏打機玩PS3。你叫佢去馬尼拉最hit、最多tubetop短裙靚女出沒的酒吧區Greenbelt？佢老喇（註：小子今年25歲），佢14歲就開始蒲吧，18歲你再叫佢落酒吧，佢已經乜都玩厭兼看破紅塵，唔知去到做乜。𠵱家成日話要靜靜哋，早午晚潛吓水，傍晚陪我對住個無敵大夕陽，睇吓大電影，執吓椰青當做運動，已經好夠囉。呢啲係咪叫做宅男？

■放學時間，Anilao條街才多些人在走動。

■離開resort不遠的草地，好似電影海報咁靚。

玻璃色海水

有時，Oliver會帶埋我同住客一齊去islandhopping。圍繞我們的resort，有好多無人島，我們可以在無人島上野餐、游水。在帽子島那邊，沒有很多珊瑚礁及碎石，沒有躲藏的魚，但有玻璃色海水。有時若遇潛水友Andrea有住客到訪，Oliver便會在Anilao留多幾日，跟Andrea日潛夜潛。其實Andrea係另一間resortSolana的主人，佢間resort甚具傳統菲律賓風味，除有靚景外，又有獨木舟和水上單車。
從無人島回程時，大家更可順道去shopping，或睇水中火山，更可以去騎馬仔，繞着三千幾呎高的小鎮邊走邊欣賞火山。讀者呀讀者，睇到就快啲嚟Anilao，我喺度等緊同你哋一齊出海㗎！

■巨蟹色彩鮮艷。Oliver攝

■在海底，無論心情和動作都要放慢。

■船一停，Bowry急不及待落水要跑。

■Resort中的傳統小樓房，好有菲律賓風味。

Solana
地址：SanTeodoro,Mabini,Batangas
網頁： http://www.divesolana.com

Oliver私相薄

■Anilao的海蛞蝓特別多種類多色。

■鍾意在夜晚出動的躄魚。

■顏色鮮艷好多的小丑魚。

下周菲律賓
馬尼拉
天晴，
27-31℃