牛：畢傑，你講到西甲點樣勁，水準唔差得過英超，不過周中歐聯16強首回合，4支西甲兵冇一支贏波喎。
畢：唉，我都好失望，好似周二諗住整條西甲2串1，馬體會W過巴塞W，馬體會兩度領先都畀波圖追和，巴塞門將域陀華迪斯又慌失失累事，搞到球隊先失波，好辛苦先追成平手。
牛：諗住西班牙兵周二唔掂，周三有權反底，點知呢排咁神勇嘅皇馬，主場輸一粒畀利記，更連入球機會都唔覺有，維拉利爾亦都好慘，千辛萬苦先迫和彭拿典，睇𠵱家形勢，隨時4支西甲歐聯兵，得番巴塞晉級8強。
畢：皇馬出局，咁對巴塞就頭痕嘞，事關呢排巴塞成日聯賽失分，皇馬追吓追吓，巴塞只領先7分，如果皇馬專心打聯賽，未嘗唔係冇得追。
牛：周六就有一場好特別嘅西甲，愛斯賓奴主場對皇家馬德里，愛奴上場就神奇嘞，作客巴塞贏2:1，打破對手今季主場不敗身，但今次對皇馬，又唔知會唔會放水呢？
畢：呢場我都驚驚哋，事關之前貝迪斯就係好例子，主場賽和巴塞，搞到巴塞失2分，轉頭就輸畀皇馬，主場已開「主其他」，你都咪話唔誇張。
牛：唔揀西甲，你又有咩心水？
畢：熟我嘅朋友都知我捧祖記，佢哋作客輸一粒畀車仔，表現唔失禮，臨完場尼維特遠射斜出，更差啲追和；今次祖記番返主場，對近況極差嘅拿玻里，我信祖記可以攞番3分。咁你又有咩心水？
牛：我呢排做咗名燈，澳職聯總決賽我捧勝利，大家知點做啦！