世上無奇蹟，金管局任總半年後退休已成定局，誰人接任卻冇乜懸念，由金融街到下亞厘畢道，人人都認為煲呔愛將、特首辦主任陳德霖被睇高一線，不過呢個世界總有人扒逆水，話世事無絕對，咁至有情趣。
新總裁任期要清楚
何解呢？話是如此說的，由於任總自金管局成立後就一直坐正一哥，正是前無古人；佢退休而去，如何聘請新總裁基本上冇先例可援，有乜要求、條件、待遇暫時冇人說得準，由於《外滙基金條例》冇列明總裁任期，日後簽新合約時，應唔應該寫清楚任期，相信都要諗真啲。否則請個人返嚟做終身制，以今時今日政治環境，民意好難接受。
雖然陳德霖接任冇乜走雞，但做戲做全套，小道消息話有關方面有可能環球獵頭，至於獵個乜嘢頭回來，就要屆時先知道，萬一有個超級猛人入紙，陳德霖都唔係坐定粒六咁話。另一方面，政商界都有唔少人力挺任總坐多一會，因為金融海嘯第二波殺到，市民見到一個白頭佬坐鎮先至有信心云云，是但搵個黑頭人回來送走白頭任，後果可大可小邊個負責先？
如果真係咁，八方反而認為易辦事。好簡單，一於要求獵頭公司獵個白頭人返嚟，至於陳德霖，則要自己諗辦法嘞，鍾意即時變白又得，逐漸變白都得，得咗！
首要條件係「先知」
白頭佬易求，有樣嘢更棘手，包括任總在內一眾財金高官，都被人批評面對金融海嘯、迷你債券後知後覺，新總裁若非先知，又如何做好呢份工？八方唔知陳德霖係咪先知，只知全城人唔使睇水晶球，都未卜先知佢會步步高陞啫。
講番任總，立法會調查雷曼迷債個委員會，審完財經局局長「儍強」，應該就輪到請任總出席聆訊解畫，萬一議員未問完，9月佢退休後，都要再去立法會接受議員質詢，反而新任金管局總裁未必有需要出席聆訊，因為過去一、兩年都係任總揸fit，問其他人都冇乜意思。八方又聽聞前局長肥馬都有可能在傳召之列，因為佢在任時搞過發債，有人認為係種下金融機構以「迷你債券」為名，實際賣高風險產品禍根，所以歸根究柢，肥馬都未必能置身事外咁話。
mailto:[email protected]