「我今年一定要考到車牌買車！」少女范萱蔚嚟緊會單拖出碟，將會Plug台《比武招親》MV內名車盡出，講男仔用名車奪歡心。「我鍾意Hummer，或者『圓姑碌』車仔。」好時下𡃁妹仔，原來已經唔鍾意拉利類超跑，「我唔鍾意太快。」亦唔使開篷，「我怕吹亂個頭。」天窗呢？「我好怕曬。」
文：嘴嚼爺
攝影：周旭文
不愛快車二百幾嚇死人
今日課題係「有車識女仔容易啲？」好多男仔男人都係咁諗，包括我，更加一廂情願二十出頭後生女應該鍾意刺激，揸架辣跑出尖東兜轉必有所獲。不過，原來我呢個「極速傳說sky哥哥」諗法已經out，今期𡃁妹代表范萱蔚話唔鍾意快車，「我都坐過法拉利，好驚，嗰次好似開到二百幾……呀，講唔講得㗎？」如果喺珠海賽車場開到二百幾，應該得，「唔，試過一次就得喇，好驚好危險。」超跑唔啱，悠閒開篷公子哥兒仲唔啱數？「都唔使喇，開篷吹到個頭亂晒，天窗都最好唔好有，我好怕曬。」咁鬼純品，淨係諗怕曬，唔諗吓月黑風高上飛鵝之巔睇星星，out~~~（餓狼咆哮聲）「遊車河唔一定要夜晚嘅。」錯錯錯，原來你哋班餓狼完全唔明白女仔心呀！
陳小春架Hummer 好man
拍檔裕美已經考到車牌，范萱蔚都立定意向，「考咗牌要買車。應該會買個樣得意啲嘅車仔先，不過一定要有5個位，因為想載屋企人。」范萱蔚拍MV搵到好多朋友幫手，「有老細（陳百祥）借嘅賓利，仲有法拉利、平治，我諗嗰度加埋都有幾百萬。」原來好多有錢朋友，「唔係唔係，佢哋多數做生意㗎嘛。」我都有做生意，可惜曼聯和波，我啲生意失敗咗，繼續搭港鐵。Hummer呢？鍾意大？「Hummer係DreamCar，太大架驚揸唔嚟，我都係會雞手鴨腳嘅女司機嚟，我屋企人聽見我話學車都好擔心，哈哈。」咁男仔揸Hummer咪引死人？「係呀，好Man，我好鍾意。」揸Hummer好man咩？「我喺街度見過陳小春架Hummer呀。」哦。
最愛「圓姑碌」車仔
車仔，MINICooperS啱唔啱胃口？「呢架個樣都好靚呀，你睇，連個倒後鏡都圓過人，不過好似好『扽』。」無錯，呢架CooperS外形圓潤Cutie，但係內藏Turbo引擎，起步夠彈，加速亦夠力，而且車身較短懸掛偏硬，掟彎好。「咁咪好似我？雖然我鍾意Cutie車仔，但係我唔鍾意擺CutiePose㗎，睇唔出咩？」
規格
引擎：1,589c.c.直四引擎＋Turbo
馬力：175hp/5,500rpm
傳動：6前速Steptronic半自動波，前驅
售價：$324,800
查詢：BMWHK（27145271）