屋漏兼逢連夜雨，瑞銀（UBS）舊年嘅虧損破晒紀錄，最近又因為捲入協助美國客戶逃稅疑雲，俾美國奧巴馬政府告到甩褲。UBS上星期同意繳納60億港紙兼300個客戶資料，但始終未能息事寧人，官司有排拖，股價當然係咁跌，點算好？
股價即彈逾15%
呢個又係老行尊出山嘅時候，UBS噚日終於陣前易帥，宣佈委任今年67歲嘅瑞信前榮休董事長OswaldGrubel擔任CEO，即時生效；而舊年夏天上任嘅MarcelRohner，就甩難鬆人。
Grubel一登場，UBS股價即刻反彈超過15%，皆因佢嘅往績實在太厲害。
炒債券出身嘅Grubel，喺瑞信默默耕耘近40年，03年至07年擔任CEO期間，該行嘅純利更以倍數上升。過咗檔同老東家打對台，Grubel即刻派定心丸話，雖然未來仍有好可怕嘅挑戰，但UBS有7.7萬名一起拼搏嘅員工，佢會帶領集團重返有錢賺嘅成功之路喎。