社民連三子前日喺立法會「掃場」，強搶鬍鬚曾嘅演辭兼掟蕉，俾鬍鬚曾鬧佢哋無聊幼稚。噚日鬍鬚曾同長毛再戰立法會，喺預算案簡報會上相遇，言語間各不相讓互相寸嘴，長毛鬧鬍鬚曾講假話，又指所謂問責局長、官員，實際上唔使負責；鬍鬚曾不甘長毛所噴，反指長毛亂噏，再次證實長毛真係好無聊，佢前日評論冇講錯。
保皇黨想踢走惡男
鬍鬚曾呢番話辣㷫長毛，長毛反問鬍鬚曾係咪佢肚裏面條蟲，否則點知佢咁無聊？唔通鬍鬚曾係佢嘅心理醫生？在場人士聽見兩個大男人好似小學生咁駁嘴，都嘀咕真係幾無聊，好在委員會主席卿姐夠吉士，即時喝停兩人，指令佢哋有乜恩怨，應該會後私下拆掂，唔好嘥佢同其他議員時間。
前日有幾十個議員聯署譴責社民連，噚日有消息指保皇黨中人想引用《基本法》第79條，集齊三分之二議員簽名，以行為不檢譴責社民連三子，令佢哋喪失議員資格，不過八方問勻都冇人認頭有此搞作，可能有無聊人無風起浪，泛民飯盒會今日亦會討論事件。