愛華頓近期認真黑仔,周日作客對紐卡素一場波就傷兩件主力,前鋒安尼捷比遭對手中場路蘭踩傷左腳,周三證實要4星期先有得復出,中場大腦阿達迪又啱啱喺西班牙完成膝部手術,至少休息6個月。加埋耶高保、占士禾漢、華倫天等長期傷兵,領隊莫耶斯真係頭都大,呢排都只係靠魯迪維爾、丹高士寧等𡃁仔頂硬上。周六拖肥糖主場對西布朗,莫耶斯求神拜佛唔好再添傷兵,甚至可能比攞3分更高興。