周中8場歐聯16強首回合，贏得最精采嗰隊，竟然係喺賭波界有「衰波之王」之稱嘅拜仁慕尼黑。呢支德國班霸喺聯賽害人不淺，上場德甲輸俾科隆1:2爆9.5倍冷W同22倍波膽，但前晚迅速反底，作客葡萄牙仲大炒士砵亭5:0，爆個200倍波膽出嚟，問你服未！
「我哋啲運返晒嚟」
拜仁今季喺德甲衰到爆，歇冬後4場聯賽輸3場，21戰得11勝5和5負，家陣喺聯賽榜排第4，落後「1哥」漢堡4分；若然球迷長追佢哋嘅話，更只係得8次贏盤。不過，唔知佢哋教練奇連士文係咪同觀音借庫嚟，前晚作客士砵亭憑列貝利同埋東尼各入兩球，加上高路斯亦入一粒，爆冷大贏5:0，入硬8強咁滯；而計埋呢場比賽，佢哋喺7場歐聯錄得5勝2和，兼且有4場保清白之身，當中仲5次贏盤。
德甲歐聯兩個樣
同一班球員，而且照理歐聯水準高過德甲，拜仁喺兩個賽事嘅成績冇理由差咁遠。佢哋嘅意大利前鋒東尼表示：「真正嘅拜仁終於喺今晚（周三）返嚟。關鍵係在於成隊人都決心走出困境，於是攞個心出嚟比賽。」至於總經理漢尼斯就話：「近排我哋喺德甲冇乜運，但今晚運氣好到爆。」教練奇連士文就咁講：「只要我哋喺德甲比賽時謙虛啲同認真啲，要追上去難度唔大。」
綜合拜仁高層、教練同球員意見，佢哋喺德甲打得差，皆因欠運、輕敵同埋決心唔夠，同實力完全無關。講真，佢哋陣中有盧斯奧、列貝利、東尼同埋高路斯等世界級球員，級數真係唔使懷疑，不過喺歐聯比賽，一場波嘅勝負或者一個作客入球或主場失球，都足以定生死；但打聯賽就唔同，今場輸咗仲有大把場數追，而大炒抑或小勝都只係攞3分，所以就算改變比賽心態，我求大俠都唔認為佢哋喺聯賽可以洗刷「衰波之王」呢個污名。
嚟緊禮拜日拜仁喺德甲作客雲達不來梅，講近況不來梅仲衰，歇冬後4場聯賽攞到1和3負。雖則拜仁啱啱大勝，但今季打完歐聯打德甲，成績麻麻，6戰3勝2和1負，如果淨係計歐聯勝仗就係2勝1和1負，所以，咪見佢哋有場漂亮勝仗就落叠，追寶尾之前真係要諗清楚。