無論淡市旺市，推銷任何商品，搞旺人氣都係最常用手法，賣樓都係一樣。好似四叔李兆基嘅恒基地產（012），集團近排賣緊今年頭炮新盤大角嘴亮賢居，就搵嚟唔少城中資深投資者同名人撐場，增添星味同人氣。
趙曾學韞問價
個盤示範單位同售樓處，設喺尖沙嘴美麗華商場，繼日前活躍樓市嘅投資者黎汝遠，同美容界天后鄭明明先後到場參觀後，噚日輪到慈善名媛趙曾學韞出場，恒地兩位副總經理鄧鳳賢同余孫謀仲親自接待。
趙太參觀完後，對個盤頂層成四千幾呎嘅複式「亮全城」好有興趣，仲即時問吓價錢，恒地當然識做，即時話個單位意向價7500萬。聽講，趙太好欣賞個盤嘅外形設計同埋會所設施，話好有豪宅級數feel，覺得個價錢吸引，相信呢個座落大角嘴舊區嘅新盤有升值潛力。
究竟趙太最後有冇入市，咁就要遲啲至有分曉嘞。