着重包裝的年代，品牌形象重要還是產品實用行先，消費者開始混淆不清，先勿論可信程度，廣告的無限創意確有其欣賞價值和話題性，為鼓勵更大創意空間，《蘋果日報》以「創意就係敢」為口號首辦「蘋果創意廣告獎」，頒獎當日找來四位廣告人大談廣告經，原來現在香港廣告稍遜於大陸，全因──唔敢──兩個字。
記者：許維雅
攝影：譚盈傑
黃炳培（StanleyWong）
又名「又一山人」，96年任英國BartleBogleHegarty廣告公司的亞洲創作總監；99年任tbwa（香港）廣告公司行政總裁及行政創作總監，其平面設計及廣告作品曾獲三百多個獎項，代表作有替癌症基金會拍攝的防乳癌廣告。
畢明（ElaineChow）
資深廣告人，10年間從撰稿員直做到執行創作總監，先後於多間國際廣告公司包括EURORSCG及DY&R負責大中華及亞太區廣告創作企劃，多次榮獲本地及國際大小廣告獎項，代表作為百佳黃老太，現任壹傳媒集團創作總監及壹傳播網絡播放有限公司行政總裁。
梅萬德（LeslieMee）
一位集合文字美術才能的美術總監，01年連同陳大仁（Paul）、曾錦程（KC）等四位廣告創作人創辦陳曾黃朱梅廣告公司，代表作有Sunday電訊廣告系列，其他客戶包括九巴、HSBC等，曾奪20多個國際及本地廣告獎項。
鄧志祥（CCTang）
入行20多年，當過奧美集團及香港恒美國際傳信等廣告公司創意總監，現為理大設計學院助理教授，人稱「阿公」，以天地線廣告最膾炙人口，黎明頓成為電訊公司標記。
明星效應本末倒置
新一代廣告草草用某某明星掛帥，站出來說兩句似已說服力十足，開天索價幾百萬的代言人俯拾即是，廣告作用變質？效用大小究竟走到那地步，明星真的如此不可或缺？
鄧=鄧志祥
畢明=畢
黃=黃炳培
梅=梅萬德
記=記者
鄧：廣告係Gimmick，Create一件事出嚟，如果背後Marketing做得唔好，件產品唔得就點宣傳都無用。廣告唔係仙丹，一間公司睇得重唔出奇，但一定唔可以係全部，比例佔五分一已經好巴閉。
畢：講真，𠵱家啲客相信廣告嘅程度細咗。
鄧：好似我做廣告賣車，宣傳好唔代表一定賣得，都要架車本身好、分銷好、事後維修配套好先有用，廣告只係最面嘅一層，大家最容易接觸到嗰一層。
記：覺唔覺得𠵱家啲廣告偏向浮誇？今次「蘋果創意廣告獎」用肥妹仔宣傳，算唔算反智？
鄧：用肥妹仔唔算反智喇，反智得過啲纖體公司廣告！以前好恨做到啲廣告可以放喺MTR宣傳，大家盡力諗點可以做得靚，𠵱家睇到頭都暈，成個鐘都未睇完。
畢：搭MTR唔會停留太耐，唔同手執一份報紙慢慢閱讀，所以Presentation應該簡單，無理由將成本書放上去嘛。
鄧：其實我哋做廣告都好似做副刊咁之嘛。
梅：都係Entertainment。
鄧：無錯，我哋都係娛樂緊人，人哋追緊《珠光寶氣》，你有30秒廣告時間但娛樂唔到人，人哋真係掟杯㗎。
畢：一定要夠Attractive。
記：點睇廣告趨勢轉化成明星效應？
鄧：我鍾意明星呀，Angelababy今晚嚟唔嚟呀？哈哈哈。
畢：聽講你鍾意黎明喎。
鄧：黎明嗰啲係逼住要鍾意㗎，哈哈哈。唔係，其實你唔鍾意佢，又點會搵佢做主角呢？
畢：我都用過唔少劉德華㗎，明星效應的確慳番唔少時間，因為明星本身已經係大眾熟識人物。
黃：我從來都唔鍾意用明星，我唯一用過嘅係劉翔。
畢：以前係廣告揀明星，𠵱家係明星做廣告。
黃：可能我唔Update啦，我有時都搞唔清楚，𠵱家廣告主角係明星定係Product，明星效應，用得其所就無問題。
畢：近年風氣已經唔同晒，客戶心目中已經有個明星指定要用，並唔係廣告概念行先。
黃：唔理紅唔紅，總之我係想用佢！咁樣其實幾本末倒置。硬用明星，有啲無傷大雅，有啲好破壞性，好似ShakeShake薯條咁，效果好又吸納到Fans，咪無所謂囉。
畢：明星好似包裝紙咁，包裝得件事靚咪得囉。
鄧：嗱，「雪雪雪」咪經典囉，哈哈哈！
記：蕭正楠？好多人笑㗎喎。
鄧：嘩，你開名？「雪雪雪」咁好笑，咪因為娛樂到大眾囉，我無話係破壞，我話經典咋，睇你到𠵱家都仲記得！
記：電訊公司算唔算最肯花錢做廣告嘅客？
鄧：香港寬頻近年做得幾好，但電訊公司廣告唔夠纖體公司嘅廣告咁多，可能女人錢易呃，瘦喎，女人真係信足咁多年。你估你話生髮就真係生髮咩，我又唔會信喇。
記：廣告都係呃人㗎啦。
集體：嘩，你唔好咁講呀，唔係㗎。
鄧：你千祈唔好咁講。舉個例子，有個做電影Production嘅後生仔，睇見某套電影加咗特技效果，就話：「都無樣嘢真嘅。」導演聽到即鬧：「做呢行都唔信呢行，你唔好做啦。」作為廣告人，點可以覺得廣告呃人呢？
畢：你只可以話廣告隱惡揚善，但絕唔能夠無中生有。
北上拍廣告成趨勢
電視廣告概念變人物變，就連拍攝地點也變，不少廣告都轉移到台灣、新加坡或東南亞國家製作，北上中國更仿似是大趨勢，香港人思想保守，反而連累了自己。
鄧：香港細嘛！以前我哋喺香港拍廣告，攞個廣告去台灣、中國用，𠵱家掉番轉，要就埋台灣、中國明星檔期，你一定要過去拍。
畢：𠵱家北上拍廣告，的確係大趨勢。
記：因為成本較低？
梅：唔關成本事，市場係咁，台灣歌星紅，啲客鍾意搵佢哋做代言人，你自然要過去拍。
記：網上廣告發展又點睇？
梅：OK㗎，雖然暫時未有出色代表作，因為客戶始終未好相信網上廣告，仍然覺得傳統媒體有效啲。
畢：暫時，大眾仲未算好懂運用網上媒體，加上香港網上廣告文化討厭擾民式居多，遮住你睇嘢逼你睇咁，都係阻礙發展嘅原因之一。宜家傢俬有個網上廣告，借題發揮美國總統奧巴馬入主白宮，叫人幫佢佈置白宮新居，效果好有趣。
梅：最大問題係客戶唔肯畀錢。
鄧：可以咁講，客戶肯畀五萬做廣告，但只會分配斗零投資喺網上廣告，太唔成比例，好難做。
梅：其次係年紀問題，決策人年紀偏大，唔理解年輕人可以廿四小時對住部電腦，唔信呢個媒體。
畢：佢哋唔會畀錢買自己唔識嘅嘢。
記：網上廣告好難做？
鄧：都唔係嘅，𠵱家好多公司專做網上廣告，好似Farfar、e-Crusade等都好成功，學榮華廣告話齋：「行船爭解纜！」唔識都要搶住做先。
畢：香港做網上廣告嘅人才唔多。
鄧：要有好多技術上嘅認識，正如網頁出現Loading幾多%呢個畫面，已經可以成功留住好多網民，唔做開網頁根本唔明。
梅：短時間內都唔會有乜發展，因為香港人思想較保守。
鄧：網上廣告發展，睇一間公司嘅分佈人數就知，好似同一間廣告公司OM，香港得二百人，大陸就有成千人。
黃：無計，大陸接受創意嘅能力高好多……
創意民意
為推動更多創意廣告的發展，《蘋果日報》今年首辦「蘋果創意廣告獎」，在多個參賽者中選出十個具創意的平面廣告作品及頒發六個大獎。為表公平，一半分數由公眾投票，一半分數由評審計分，參賽者更不限是否《蘋果》客戶。頒獎當日由多位不同打扮的演員展示入圍作品，鼓勵「創意就係敢」口號，不少得獎者領獎時異口同聲認為創意須要勇氣更須要毅力。
第一屆「蘋果創意廣告獎」得獎作品
