前晚花旗股市下跌冇影響噚日港股，恒指高開65點，不過A股回落，港股就腳軟，喺期指結算日，淡友梗係唔留手，恒指最低見過12691，不過，尾段隻滙控（005）大幅抽高，升4.2巴仙，恒指收市只跌110點。
英國政府噚日公佈擔保兩大銀行嘅毒資產，滙控係咪借勢炒上就唔知，不過下禮拜一公佈業績，滙控嘅業績肯定左右大局。
建行P輪15763：建行（939）昨收3.90元，跌2巴仙，股價呢排喺4元關前徘徊，始終冇力破關，噚日跌穿條20日線，走勢有啲唔對路，一旦跌穿3.70元，有機會下試3.20元，可以諗吓隻P輪15763，噚日收61仙，有效槓桿2.9倍，正股見3.20元，15763可見1元，正股升破4.20元，就沽咗隻輪止蝕。
俊樺