世界經濟大亂之際，美國總統奧巴馬組織咗一個內閣及白宮幕僚班子，據講呢班謀臣教育程度之高，令人咋舌，多數係名校畢業生，特別係長春藤名校產品。一位彭博通訊社評論員KevinHassett（長春藤U.Penn經濟學博士）喺二月二十三日發表一篇評論講及奧巴馬嘅經濟班子幾乎全部係麻省理工或哈佛博士：例如奧巴馬係哈佛法學院畢業生，首席經濟顧問森瑪士十六歲入MIT，後在哈佛攞博士，二十八歲成為哈佛最年青終身教授；白宮經濟顧問羅馬女士係MIT博士；成員有CeciliaRouse（哈佛）、AustanGoolsbee（MIT）；仲有老人家Volcker（哈佛）係特別顧問，白宮內二十七名高級顧問之中，有二十名來自長春藤聯盟。另外《新聞週刊》提到奧巴馬幕僚之中，多是哈佛耶魯嘅叻仔叻女，佢哋嘅SAT分數加加埋埋，係甘迺迪總統嘅幕僚先至可以比較。當年甘迺迪嘅國家安全顧問McGeorgeBundy以三十四歲之年，就成為哈佛一個學院院長，IQ爆棚。
身邊有咁多叻人，係唔係一定掂？咁又未必，唔使畀呢班高智慧教授嚇親。Bundy咁巴閉又點吖，佢認為美國應該大力介入越南戰爭，後果如何，唔使多講。
森瑪士為人太叻，對IQ比佢低之人冇耐性，聽別人發言，聽聽吓就露出悶親嘅樣子，令別人不悅。Hassett話奧巴馬物以類聚，自己醒過喬治布殊好多，故此身邊亦召集咗大批叻仔叻女，但細看之下，在意識形態方面，咁多哈佛MIT畢業生，思想接近凱恩斯學派，冇乜「異見分子」（例如芝加哥學派），故此奧巴馬不外乎亦係鍾意聽啱聽說話嘅人，以後不斷干預經濟，不斷出手救市，乃可預卜，如果凱恩斯理論解決不了當前經濟難題，全世界都會遭殃。
報紙管理人M亦睇到Hassett篇評論，來電郵云：「相比之下，香港相差好遠喎，甘乃威叫陳家強辭職㖭！」咦，睇真啲，又唔係噃，照計香港特區政府與奧巴馬未必冇偈傾，嗱，特首曾係哈佛碩士，財政司長曾係MIT加哈佛，與美國領導班子對晒口型啫，陳家強局長係芝加哥大學博士，讀書拋離甘乃威幾十個馬位，美國方面會尊重佢多過我哋啲議員。