《銀行遊俠》屬當年Enix繼《勇者鬥惡龍》後另一經典，事隔多年，第四集終於登陸次世代XB360，全3D化就梗㗎喇，難得人物造型有番日系味道，唔似《無盡探索》、《最後遺跡》咁重「西味」，新加避開視線戰鬥系統，成功後可令敵人睇唔到自己、之後任你超必魚肉，偷襲得手嘅感覺，真係幾爽㗎！
文：喬丹峰
日風靚畫省招牌
RPG萬變不離其宗，第一睇畫面同人設，第二就係戰鬥系統，兩者盡失肯定唔係一隻好嘅RPG；SquareEnix《最後遺跡》、《無盡探險》連扑兩鑊，銷量口碑一般到痹，第三款《銀行遊俠》食老本續作，唔可以玩殘金漆招牌，終於「西味」無咁重，有番日系RPG風範，男主角靚仔後生，女主角有咁萌得咁萌，打開狀態畫面，日風2D人物令人相當回味，加上SE大玩最耍家嘅靚爆CG，整體影像感覺絕對係一級。
遊戲舞台仍然以宇宙為主，一開波主角已經坐架太空船發展劇情，整個系列出名地圖大、世界觀更大，你睇《銀》用到3隻DVD嚟裝就知故事有幾龐大，鍾意玩遠征嘅機迷一定啱。大量支線劇情已成指定動作，較過癮係SP系統，除咗練技能外，仲可製作特別嘅物品，精采處係製作物品時，會出現分支動畫，大部份都好有日式爆笑意味，如Edge會脫皮而進化，算係笑點嘅來源。
最令我欣慰嘅，係唔再如前兩作般玩假MMORPG（兩頭唔到岸），更不會如PS3《白騎士物語》夾硬Online組隊（慘死收場），《銀》乖乖做番一隻單人玩嘅RPG，我就係鍾意匿喺屋企，喪煲Level打大佬！
閃盲點小心被抽水
08年尾XB360支援硬碟安裝後，讀碟情況越縮越短；《銀》安裝約需6GB空間，戰鬥讀取縮至3-5秒，算可接受，但有網友就話裝完《街霸IV》再裝《銀》，連埋之前嘅Demo，20GB差唔多用晒，XB360又唔可以自己買大容量硬碟嚟裝，勁頭痕。
論戰鬥系統，《銀》同《TOV》實在好相似，一個範圍內玩走位逐個擊破，再落柯打畀幾個AI同伴幫拖。誰好誰差，兩派Fans喺討論區拗到要鎖文；論畫風，我當然首推似卡通嘅《TOV》，以初期嚟睇，戰鬥節奏兩者不相伯仲，但《TOV》玩駁招，去到中後期簡直變成有Saving嘅《街霸IV》，Combo指令超複雜，但打起上嚟爽快得多，而《銀》就較有策略性，新加「盲點」系統，儲滿氣睇準機會，就可閃到敵人背面攻打WeakPoint，Boss戰必定要學識，不過遇着複數敵人就要小心，閃得一隻，第二隻會乘機抽你水，變成偷雞唔到蝕把米！好彩成功閃到幾百次後，會學識新招DoubleBlindSide，無咁易俾敵人偷襲番轉頭。以熟練度學識新招，令我又不期然諗起《Talesof》系列。唉！呢排《街霸》上腦，都係幾十Hit連續技好玩過一味閃嚟閃去。
Profile
《銀河遊俠4：最後希望》
遊戲類型：RPG
對應機種：XB360
遊玩人數：1人
行貨售價：$329
開發商：tri-Ace/SquareEnix