改革開放初期，鄧小平同志將閘門打開，令一批又一批大陸學生成功出國留學。當年，有人批評話閘門咁樣開法，會令大陸人才外流，祖國冇晒叻人建國。
創新方搞亂市
聽聞小平同志好英明咁答，話一百個學生走去學嘢，只要有一個回流，祖國都有賺。咁其中一個呢啲大陸留學生，今時今日喺花旗國人氣急升──佢嘅英文名就係DavidX.Li。
佢有咩咁叻？佢就係度咗一條叫Gaussiancopulafunction嘅方程式，去預測兩件事嘅互相關聯率。即係預測如果我一旦失業，我開車撞車嘅機會又會大咗幾多。
曲線收服美帝
未有佢條方之前，大家要睇好多歷史數據，甚至只可靠估。不過條方喺2000年出現之後，就好似解決咗個問題。條方勁嘅地方，就係靠睇我份失業保險保費嘅價格變動，亦同時睇埋我汽車保險保費嘅價格變動，去決定兩件事嘅互相關聯率。
當機會率有得計，就可以作價做買賣。例如以前，花旗國啲按揭，因為有啲人會提早還、轉按、有啲人會走數、斷供，仲有金融機構將好多按揭同時包埋一齊再切開嚟賣，好難掌握咁多變數，幾貴幾平都會冇人買。有呢條方之後，就好似有得計。最後短短幾年內，衍生出萬億元大嘅衍生工具市場。
當然，條方要準，啲用來計算嘅保價就要準。咁歷史已證明保價完全錯晒，條方出事令英美嘅銀行系統因而危在旦夕。小平同志當年冇講嘅係，派學生留學，原來係為咗不費一兵一卒，就可以收服英帝、美帝。
孫柏文
http://phatdat.blogspot.com