近年政府想大力搞活大嶼山大澳，成為一處具本土特色嘅旅遊點，最近就將當地嘅歷史建築舊大澳警署，交畀信和集團成立嘅非牟利機構「香港歷史文物保育建設有限公司」，改裝做精品酒店，附近即時有業主借呢個消息出貨。
噚日，有拍賣行獲委託拍賣一幅大澳商業地，開價要成6000萬。不過，唔知係因為個價開得太高吖，定係大家唔熟大澳地產市場，當拍賣官開出底價後，現場完全冇反應，拍賣官可能都心知乜事，嗌咗一兩聲之後，就即場收番，前後都唔使一分鐘。
借保育計劃賣地皮
拍賣行營業經理蔡文錦事後話，都有兩間發展商攞過呢塊地嘅資料，但係之後冇下文，佢冇揣測塊地點解賣唔出，同業主遲啲會唔會減價再賣。
呢塊地喺石仔埗街，對住大澳社區中心同遊樂場，同舊大澳警署有一段距離，地皮1.5萬方呎，可建商廈或戲院。