雖然受到社民連滋擾，不過鬍鬚曾總算有驚無險讀完預算案，完成呢個重要任務，佢心情似乎輕鬆好多，離開立法會時，同助手安步當車行返政府總部，其間咁啱見到財經局局長「儍強」陳家強，原來大家都唔搭車，寧願行路返辦公室。
記者問財爺點解唔坐車行路返政府總部，佢可能環保上腦，成日掛住預算案提到架電能車，有官員竟然話行路係想慳番啲能源，其實高官架車已經泊喺立法會停車場，坐唔坐，架車都要由司機開返政府總部，一樣要用燃料，佢唔坐車，唔代表就係支持環保，呢啲對白，下次都係慳番好過啦。其實佢離開立法會時，正值午飯時間，中環塞車，行路隨時快過坐車就真。