一場事先張揚嘅大龍鳳，噚日果然如期公演。社民連三子喺財爺鬍鬚曾發表預算案時發難，好多市民睇到眼火爆，斥責佢哋做騷博出位阻住地球轉，浪費公帑侮辱選民應該返屋企，但亦有人當睇戲，仲指社民連攪局造詣又上一層樓，今次互相補位兼有起承轉合，真係值回票價咁滯，只怕今次玩到咁盡，下次唔知仲有乜招數為fans帶來驚喜，擔心社民連就此冇貨。
肉緊企起身昅實
男主角鬍鬚曾面對講數式掃場，表現尚算淡定，一直笑笑口任人糟質，一副睇你玩得幾耐、點樣收科表情，反而財爺夫人黃蓮華好肉緊。鬍鬚太噚日身穿淺色印花套裝去立法會旁聽預算案撐老公，坐喺二樓公眾席第二排中間位置，當見到毓民、長毛等人衝埋老公身邊有所行動時，佢顯得好擔心老公安危，緊張到企起身昅實老公有冇事，十分真情流露；而佢身旁行會成員卻無動於衷，人人一副不耐煩表情，「究竟幾時繼續開會？」
同樣是劍術高手
鬍鬚太護夫情切，長毛等人應該慶幸佢冇出手接招，否則社民連未必有運行。鬍鬚曾係劍術高手眾所周知，原來鬍鬚太都精於此道，據講兩公婆後生時都有過幾招，雖然鬍鬚太謙稱自己功力不如丈夫，然而真人不露相，萬一佢老公被人踩到上心口，連自己份工都不保，遑論撐企業，保就業，不排除鬍鬚太出手相助，使出玉女劍法，甚至雙劍合璧，丐幫人多勢眾都未必頂得住。
其他旁觀搗亂過程嘅司長、局長表情則顯得好無奈，坐喺隔籬嘅律政司司長黃仁龍全程木無表情，只係企起身免得殃及池魚，至於政務司司長唐英年，表現得好似好嬲，一直怒目注視長毛，對掃場鬧劇應該十分不滿。其他局長神情肅穆，直至立法會主席曾鈺成叫停會議，都留守議事廳，陳家強同鄭汝樺兩個局長一待會議暫停就匆匆離席，據講係人有三急，正好有機會解決需要。
其他議員多數批評社民連所為，行會成員劉江華上次喺包機事件中，惡犬出籠大鬧政府羞恥，搞到政府好尷尬，今次鬍鬚曾受辱，佢喺議事廳公開鬧社民連應該受譴責，咁叻把握機會補飛，怪唔得佢上晒位啦。
mailto:[email protected]