我求大俠寫呢段稿前，未知利物浦作客皇家馬德里場歐聯戰果，只知賽前傳嚟驚人消息，係領隊賓尼迪斯將會唔教紅軍嘅行情突然高漲；有外國博彩公司，甚至因此將下一位離任嘅英超領隊賠率封盤。最騎呢係，明明喺星期二下晝，賓帥喺下一個離任英超領隊項目一直係大冷，當時仲有21倍，點解失驚無神有咁大轉變？會唔會有內幕消息，抑或有人陣前做手腳想擾亂紅軍軍心？我唔知，總之博彩公司已列名宿杜格利殊為4倍嘅繼任大熱門，行情睇好佢重作馮婦。