喺金融海嘯下，美國汽車生產重鎮、有「汽車城」之稱嘅底特律，經濟受到嚴重打擊。市內工人一係減人工，一係俾人炒，連美國3大汽車廠之一嘅福特，周二都宣佈公司高層要減30%人工。成個城市死氣沉沉，仲傳染埋畀活塞，令呢支連續6季打入東岸決賽嘅傳統強隊，周二不敵熱火後連輸7場，真係頭都痕埋！
不敵熱火連輸7場
活塞周二作客熱火大敗91:103，最慘係完全「嘜」唔住獲迪，睇住佢攻入31分兼交出生涯最高嘅16次助攻，直頭任人魚肉。今次係活塞自03年2月21日至3月2日後，再次錄得7連敗劣績；其實由今年1月10日起，活塞打21場輸16場，頹到無倫，現時得27勝28負跌落東岸第7，得勝率更加係02年以嚟首次低於5成，入唔入到季後賽都成問題。
隊波衰到咁，唔怪得自04年起保持嘅主場259場「爆滿」紀錄，都喺早前斷纜。我求大俠都明點解球迷唔入場睇波嘅，大嗱嗱畀百幾蚊美金入場，仲要睇住愛隊輸波，咪盞激到一肚氣。
班波一輸再輸，自然要搵出「罪魁禍首」。好多人將矛頭指向後衞艾華遜，話佢識攻唔識守，但我求大俠就唔認同呢個觀點喇！籃球係團體運動，點可以淨係怪一個人㗎；艾華遜俾人咁屈，真係唔頭痕至奇啦！
窮到冇錢炒教練
頭痕嘅唔止艾華遜一個，總經理杜馬士亦唔好得好多。皆因球會冇晒錢，今時今日仲賠緊前教練桑達斯今年嘅650萬美元（約5,000萬港元）年薪；加上市場上好嘅教練人工都肯定貴過現任教練居里嘅250萬美元，所以杜馬士真係想炒都炒唔落手，除非佢自己教番啦！
經濟點樣搞番好，我求大俠建議大家可以問吓曾司長；但講到活塞點樣振作，我求大俠同大部份市民諗法一樣，就係要靠自己！活塞只要打番昔日嘅「藍領球風」，咬緊牙關撐落去，總有機會翻身嘅；𠵱家隊波冇霸氣，搞到對手當活塞豆腐咁食，場場失分高達94.1分，再唔change，好快就可以放暑假㗎啦！