錯要認，打就要企定。商台節目主持人黃永月前大班上身，毓民標童，為咗大澳鳳凰木被斬，質疑新聞處知情不報斬樹事件，開咪點名怒斥新聞處女新聞官，搞到該女新聞官情緒崩潰淚灑辦公室。
事件驚動新聞處處長，新聞主任協會更去信商台投訴，黃永噚日終於公開道歉，向當事人講對唔住。
黃永噚日話，如果地政總署或者新聞處嘅人，因為佢嘅言論而受到情感上嘅傷害，佢感到好抱歉，又承認批評該女新聞官嘅語氣、字眼確實係重咗，不過佢強調當日咁火，只係因為痛心香港樹木冇得到合適照顧。被怒火冲昏頭腦，一時火遮眼係人之常情，開咪嘅人咁樣解釋，唔知廣管局收唔收貨啫。