行會噚日朝早開特別會議，聽取財爺鬍鬚曾講預算案內容，之後行會成員轉移陣地到立法會，排排坐聽鬍鬚曾宣讀預算案，以示支持。行會早前改組有五張新面孔，但唔係個個新丁都有到場撐鬍鬚曾，八方噚日見唔到胡紅玉現身立法會，唔知有冇乜嘢玄機。
除咗新界王發叔，幾個新貴平日都罕有到立法會，八方都幾肯定佢哋唔熟悉呢個政治舞台規矩，中大校長劉遵義明顯唔知碇，竟然行咗入議事廳，準備搵位坐，原來佢唔知道行會成員要坐二樓公眾席旁聽，經工作人員教路先知道自己個位置。
行會另一新貴楊敏德係大忙人，噚日都坐足全場，真係十分畀面。楊敏德愛着旗袍，坐低時令人眼前一亮，不過佢對預算案內容似乎冇乜興趣，八方見佢不時閉目養神，連社民連郁手出蕉都冇大反應，果然係見慣大場面嘅女強人。
張炳良大傷風
另一行會成員張炳良似乎帶病在身，噚日好似大傷風咁，成日拎住紙巾。公眾席上風景，除咗政治新貴受注目，仲有過氣政治人物點綴，前議員劉千石又蒲頭，石哥別來無恙，看來氣色唔錯。