體育運動有唔少迷信嘢，無非都係希望幫球隊贏波；不過，阿仙奴禮拜二歐聯對羅馬，高路托尼（左一）就因迷信遲入場，連累球隊一度要9個打11個，笑爆嘴兼幾乎出事。
話說呢位科特迪瓦後衞習慣最後一個出場，咁啱隊友加拿斯要接受治療，於是高路托尼就等對方搞掂先跟住入場。結果，半場雞聲一響，呢兩位仁兄都唔見人；之後高路托尼急急腳之下，未得球證同意就入場，食埋張黃牌。
好彩阿仙奴最後贏波，唔係領隊雲格實鬧到高路托尼七彩；雲格賽後話：「係咪迷信要問佢自己，呢次係我哋嘅錯，因為聽到鐘聲就要準備好出場。」記者問高路托尼呢次係咪職業生涯最尷尬時刻，佢笑住咁答：「絕對係！呢次唯一得着係，我識多咗條球例。」原來，佢連入場要先得球證同意都唔知，睇嚟雲格真係要教吓佢啦！