奧斯卡金像獎揭曉，最佳男主角由辛潘奪得。辛潘此君貌不驚人，記得好耐以前，佢係麥當娜的男人，演技不算好出色，但與麥當娜離婚之後，估唔到人不可貌相，辛潘越來越紅，演技越來越好，今次因為扮演同性戀而獲金像獎，紅透半邊天。
同性戀，現簡稱同志（此簡稱會令國民黨與共產黨之革命同志十分不滿，對佢哋唔知有無冒犯呢？）越來越公開。六十年前，爆料話邊位政治人物係同志，等於判佢政治死刑。但𠵱家冰島有了女同志總理，同志可以結婚，預料十年之內會有男同志總統出現。文化藝術時裝界之中，同志更多。已故時裝設計大師聖羅蘭就係表表者，佢位「拍乸」PierreBerge要拍賣聖羅蘭收藏已久之北京圓明園兔首與鼠首銅像，遭北京追討，Berge明言「勒索」北京，如北京畀達賴喇嘛返回西藏，就會願意將兩個銅像歸還中國。咁都夠膽公開講，呢位法國同志甚有北京革命同志之戰鬥勇氣。
左丁山初次識得同志呢回事，乃在中二年間。嗰陣不知通識教育為何物，國文老師乃逃離大陸嘅「知老」（有別於知青），上堂教古文，旁及中國歷史文化，無所不談，當年不知何故提到時事新聞，國文老師（外號白頭陳）話同性戀在中國古已有之，即時講埋「斷袖分桃」及「龍陽之癖」嘅故事，聽到成班細路眼眨眨，方知春秋戰國時代已有呢回事，中國古代並非純粹板起面孔之儒家道德掛帥嘅社會。白頭陳又教埋《論語》、《孟子》，唔理教育署所訂下之國文課程範圍，總之佢鍾意教邊篇古文就教邊一篇，課本明明冇嘅，佢就叫我哋去奶路臣街買舊書《古文評註》或到友聯書局買《活頁文選》（好似係一毫子一篇），校長本不以為然，但因為私校薪水低，搵到位精通古文之國文老師，並不容易，所以校長就隻眼開隻眼閉，等到有視學官駕臨，先至叫佢教番課本。白頭陳話：「我呢輩死咗之後，你哋冇人識教古文。」當時冇人理會佢，𠵱家想番起，十分感慨，陳老師有先見之明也。自問自己素來並不歧視同志（雖則覺得不舒服），皆因自少已受白頭陳老師教誨之故。