社民連衝擊議會文化，噚日更開始郁手郁腳，好多議員都覺得過火。話說坐喺陳偉業隔籬嘅白鴿黨副主席卿姐，噚日一見毓民等人攞住紙牌、香蕉玩具等道具入議事廳，已面露不悅神色，後來毓民將紙牌放在枱頭時，卿姐即時抗議指紙牌阻住佢視線，令佢睇唔到官員。卿姐一聲令下，毓民惡極都要畀番少少面，乖乖哋擺開啲紙牌，仲問卿姐收唔收貨。
見到毓民俾卿姐鬧，陳偉業仲未知碇，竟然將隻道具蕉擺到過去卿姐枱頭，卿姐今次親自郁手，將隻蕉移番去陳偉業個位嗰邊。卿姐咁均真，似乎想同社民連劃清界線，佢對社民連掃場點睇，仲使問？鬍鬚曾今朝會出席由卿姐主持嘅財委會特別會議詳解預算案，唔知社民連三子夠唔夠膽踩卿姐個場呢？