人浮於事，好多人都唔敢亂使錢，windowshopping多過真係購物，連帶舊衣回收數量都少咗。公民黨余若薇關注呢個問題，要求政府做啲嘢，鼓勵市民捐出舊衫，同時協助非牟利機構回收舊衣，創造就業機會，呢個建議好正路，不過佢問咗條問題，成個政府都唔識答。
余若薇要求政府提供去年回收舊衫總數量，仲要分開男裝、女裝、童裝計數；環境局書面回覆表示冇呢方面數字，只有舊衫出口量數字，08年有5,533公噸，07年則有6,723公噸，即係下跌咗1,190公噸；至於男、女、童裝分類，就冇統計。八方按常理推測，舊衣回收應該係女裝佔絕大多數，事關唔捐舊衫出嚟，衣櫃又邊有位容納新衫呢。