天文台預報今日有霧同微雨，矇查查睇唔清楚，襯晒家吓經濟環境，八方相信財爺鬍鬚曾都唔使扮先知預測幾時復蘇，只要叫市民望吓個天，就知前景如何。今年預算案唔少內容已曝光，官府事先張揚唔會大手筆退稅、減差餉諸如此類，因此慷慨派糖掌聲怕且好寥落，鞋鞋聲機會卻十分高，一來見到政府救市無方，二來社民連揚言今日會帶定幾對鞋入場，隨時招呼財爺。
社民連揚言掟鞋
第一個向布殊掟鞋嘅記者，被好多人視為英雄，之後有樣學樣向溫總飛鞋者，只係東施效顰，𠵱家仲玩掟鞋，究竟係好橋定技窮，自有公論，總之社民連三個議員，表明今日帶埋三對鞋入立法會，而且會放喺枱面，一旦預算案唔啱聽就出手咁話。
之前毓民掟蕉後，保皇黨好緊張話要嚴肅處理，但至今冇下文。八方聽聞立法會秘書處都冇乜符，立會主席曾鈺成噚日亦束手無策，強調一切按議事規則處理。上次就話可以考慮禁止議員帶生果開會啫，唔通今次要求大家除鞋赤腳進入議事廳？斬腳趾尚且避唔到沙蟲，barefoot又焉能阻掟鞋！
財爺身手大考驗
鬍鬚曾係詠春高手，揚言唔怕掟蕉掟鞋，甚至可以蕉來手擋，鞋來快閃。八方近日同官場中人吹水，大家都笑言想睇睇鬍鬚曾身手是否傳說中咁了得，若然佢真係擋得住丐幫突襲，官員日後就唔使再擔驚受怕云云。另一正放大假、自言今日會開定電視等睇戲嘅官員則話，最驚嘅應該係其他司長、局長，因為按「傳統」，財爺讀預算案時，好多人都會閉目養神，就算有隻鞋迎面而來都唔識避啦。呢位官員又話，如果冇算錯，今日一眾司、局長應該會打醒精神聽預算案，以免出洋相。
咁講不無道理，因為出手掟鞋者未必好眼界，八方推測誤中副車機會甚高，事實上社民連講到明冇綵排練習，掟中邊個說不準，最高危嘅係政務司司長唐英年同律政司司長黃仁龍，坐喺鬍鬚曾後面嘅局長都有機會做箭靶，今日鏡頭全程直播對住你哋，如何執生，祝君好運。
mailto:[email protected]