近期有不少藝人爆料，惜敢講不敢認，早前苑瓊丹在電台爆有男藝員做鹹豬手，官恩娜又爆男藝員企圖侵犯女藝員，事後兩人均唔認賬。而吳君如在日前播映的《星星同學會》中，大爆圈中有位「集郵女星」，愛跟紅星搞關係，四大天王中惟獨劉德華未有上釣，事後君如否認有此人存在。
吳君如早前在電台節目中，指體壇國寶劉翔「食咗屎」，事後知衰認錯，日前在無綫播映的《星星同學會》中，她請來劉德華做嘉賓，節目中君如談及華仔是女星傾慕的對象，其中一名「集郵女星」喜與當紅男星搞關係，猶如集郵一樣，並稱在四大天王中已集了其三，獨欠華仔。
說罷君如還和華仔耳語一番，之後華仔「哦」一聲，好像恍然大悟般，像是知道了集郵女星是何許人。該訪問出街後引起不少人揣測，曾與四大天王合作的女星均成為嫌疑人物。
熊黛林懶理
當坊間揣測之際，君如前晚在商台節目《嘩！嘩！嘩！打到嚟》，主動重提舊事，不過就將講過的說話推得一亁二淨，聲稱只是做戲咁做，君如在節目說：「我哋兩個好戲啫，成件事係假嘅，因為華仔咁多年嚟咁亁淨，冇乜緋聞，學友都亁淨，佢結咗婚咁多年冇去滾過，點會俾女星集郵呀。我知好多人討論呢件事，個個嚟問我，其實冇咁嘅事，都冇呢個人，我都想集郵呀，四大天王我都想集呀，呢啲只係一個訪問技巧，開吓玩笑，呢個集郵女星咪我囉。」
熊黛林昨日出席活動，談到集郵女星一事，問她會否擔心？她說：「唔知，都唔會驚。」那麼會否擔心男友郭富城被人「集」，她說：「個問題好好笑，都唔關我事。」問她是否喜愛集郵，她則說：「唔鍾意，我都冇本事應付咁多個。」
此外，劉德華和朱麗倩的緋聞傳了多年，昨日有消息指他們於4月6日赴大馬舉行婚禮，並謂兩人在情人節前已赴大馬跟朱家商討婚事，還謂華仔送贈價值約700多萬港元的萬呎花園大屋作聘禮。朱麗倩日前又被發現拖着一名年約6歲小女孩出入，樣子還激似華仔。
採訪：羅慧敏、丁寧
攝影：陳俊強