形象隨意、隨心，打扮好有個人風格嘅醫學會前會長蔡堅，挑戰精神科名醫麥列菲菲，角逐醫務委員會主席，不惜落重本改頭換面，最近豪花3,000幾蚊買護膚品同做facial。佢噚日出席醫學會春茗時，係人都讚佢皮光肉滑咗，加上蔡醫棄西裝改着CK牛仔褲，仲學MK仔陀條鐵鏈，形象180度大轉變，young晒。
做反叛年輕醫生
蔡醫好自豪咁同八方講，早前去買護膚品時，售貨員幫佢測試皮膚，話佢皮膚表面好好，只係深層好暗啞，同埋下巴有粒暗瘡，唧咗佢就冇事，用埋緊膚水塊面即刻firm晒。佢話執一執後成個人後生晒，有信心以「反叛年輕醫生形象」，擊退68歲嘅麥列菲菲。
選舉打後生牌爭票，其實蔡醫今年都年屆花甲60歲，佢又自言要學奧巴馬，競選係要change，改變醫委會被批評醫醫相衞問題。醫委會主席只係由28名委員互選，記者冇票，但蔡醫一於大包圍，聲言一旦佢當選，日後醫委會聆訊期間會預備咖啡、奶茶、三文治，等記者唔使喺荒蕪嘅黃竹坑醫專大樓捱餓採訪。