花旗嗰邊又有新嘅負面消息,就係AIG上季又勁蝕,仲話政府唔注資打救就會破產,面對一個又一個壞消息,花旗股市前晚急挫,道指直逼7000關。
花旗股市咁曳,港股好難獨善其身,加埋A股掉頭下跌,港股氣氛就更差,恒指最低見過12634,好彩收市升番上12798,算係跌少好多。今日財爺宣讀新一份財政預算案,晏晝個市可能會好波動。
中海C輪15880:中海(688)昨收10.92元,跌1巴仙,以陀螺收市,算係偏穩。股價前日升破條20日線,噚日遇上跌市都算硬淨,短線有機會上試12元,破位睇13.50元,可以諗吓隻C輪15880,昨收20.7仙,有效槓桿2.5倍。
正股升上13.50元,15880可見35仙,正股跌穿10元,就沽咗隻輪止蝕。
俊樺