由於有共同敵人──林鄭，因此阿姐近日同公民黨好多合作，除粵劇外，該黨幾個議員同聖雅各福群會合辦嘅GreenLadies義賣舊衣活動，都情商阿姐捐出兩套衫，一套係03年「明荃之友會」曾穿着嘅PinkLady短裙，另一套係阿姐嘅旗袍。
至於余若薇，就捐出一條白色百褶長褲，佢話後生時至愛；陳淑莊捐出嘅一襲旗袍，原來係佢同已故梅姐合照時着過。義賣3月7、8號舉行，所有二手衣飾10蚊起，收益全數撥予開辦再培訓課程。
舊年義賣共籌得三萬幾蚊，聖雅各福群會用筆錢開設二手時裝店，請咗三位中年婦女，今年目標係籌到六萬蚊，希望可喺九龍開分店，製造更多就業機會。