上個禮拜睇完TopGear個Show，幽靈之子、Spyker、瑪莎等一堆貴車，睇到人目定口呆，但論最特別嘅，我會揀有平民方程式之稱嘅Radical。咩叫平民方程式？原來只須付出一萬蚊，就有齊訓練課程同珠海車場試圈環節，門檻比F1同F3低得多，發夢都想做舒麥加嘅話，幾大都要瞓身揸！
記者：徐影龍
攝影：譚盈傑
Model：Wing@PureModels
首度喺香港搞嘅TopGearLive，的確引嚟唔少罕有靚車到港，就好似呢架喺世界各地都有盃賽嘅Radical咁，港人根本無機會見到，事關Radical以標準賽車規格製造，車身極之貼地，喺一般街道行，兩個燈位已甩晒包圍同尾喉，要玩只好落場砌。
其實Radical跟F3方程式性能極為接近，但一般人就算有錢都無機會揸到方程式，因為要組車隊、講資格，對於恨做舒麥加，或夢想揸方程式賽車嘅車迷嚟講，改揸Radical不失為另一折衷途徑。香港KCMG為推廣平民揸方程式，就搞咗個一萬蚊基本套餐，包括理論及訓練課程，聽完書就可喺珠海真正落場狠劈，仲有車手坐喺側邊落手教你，肯定進步得更快；揸住架百幾匹、超輕超矮車身嘅Radical，眨吓眼就飆過200km/h，掟彎亦極有方程式影子，稍為收油一扭就過，呢啲極速駕駛體驗，絕對係一生人難忘回憶，假設手頭鬆動嘅話，好可能會玩上癮！
三級課程豐儉由人
1.一日課程：人民幣¥10,000（車租、3個Section共90分鐘、A1車手親身指導）
2.一日進階課程：人民幣¥12,000（集中爬頭、踭趾等賽車技巧）
3.兩日課程：人民幣¥20,000（包含上述兩種課程）
＊受訓後試車，每30分鐘人民幣¥2,800（汽油、輪胎另計）
查詢：KCMG（31760383）
其實影呢架Radical時都幾急趕，車到港前兩日先開始拉車花，但又要趕及TopGearLive，所以造成我哋邊影相訪問、幾個師傅喺另一邊急手急腳黐貼紙，一個鐘已完成半邊車身連贊助Logo，咁大架車居然快手過我砌飛機模型。
小車神詹家圖已經大個仔，今年仲加入埋Radical車隊，雖然跟四月嘅日本F3賽撞期，不過家圖三月頭會先到珠海測試Radical，「我覺得架Radical好似我揸開嘅方程式，如瞬間爆炸力、過彎能力，以及短時間收車等，雖然MaxSpeed比真正F3差少少，大概有250km/h，但珠海賽道行唔到咁快，最盡約莫飆到220km/h，所以我都好有信心駕馭到呢架Radical，希望來年做到好成績。」
