何鴻燊俾人叫得做賭王，緊係唔可以浪得虛名。雖然佢堅稱旗下賭場日日印銀紙，反駁《福布斯》話佢身家唔見九成嘅講法，但金融海嘯下澳門賭業大鑊確係事實。噚日佢老人家就號召咗六大賭牌持有人，首次召開業界會議，商討成立博彩企業商會，研究如何合作，結果冇人敢同佢爭做龍頭大佬，全部通過選佢做「龍頭產業大同盟」首屆盟主（即係主席）。
促成立博彩企業商會
燊哥主持賭業武林大會之後話，六家博彩企業都同意要盡快成立博彩企業商會，喺金融海嘯下同舟共濟。自從澳門開放賭權後，大家為咗搶客，鬥個你死我活，但呢個世界做生意邊有永遠嘅敵人，今次大家化敵為友，唔知係咪想加強「集體談判權」，同要靠博彩稅收入嘅澳門政府講數。
賭王話，今次大家仲未講到博彩稅問題。至於搵賭客中介人嘅碼佣上限，佢話應該由六家博企指導中介人訂定，唔能夠本末倒置。其實澳門博彩業管理暨中介人總會會長，就係賭王四太梁安琪。兩公婆緊係唔使大庭廣眾講數，閂埋房門慢慢搞掂。賭王話，下次會議唔會遲過3月16日，到時就可以定出商會章程喎。