曼聯上周六贏布力般流浪，你話夠運又好，把握力高又好，總之就取得英超10連勝，咁嘅走勢，加上利物浦又失分，我求大俠夠膽講，英超冠軍，曼聯攞硬咁滯。既然球場內冇咩好挑戰，一眾紅魔就搞搞新意思，轉到廚房鬥一番。
頭炮艾拉煮龍蝦
曼聯官方電視台（MUTV）最近就搞咗個「紅魔廚房」（RedDevil'skitchen）嘅節目，請球員上嚟一顯廚藝；身先士卒嘅就係法國後衞艾拉。唔好以為法國菜舉世知名，就代表個個法國人都識煮嘢，好似本地名模AmandaS咁煮西餐煮到出晒位，成為新一代美女廚神咩。短短90秒嘅宣傳片中，已顯示艾拉雞手鴨腳嘅一面，打雞蛋打到成手都係，搓麫粉好似人哋放炸彈咁，切蘆筍就一長一短，揸住龍蝦又唔知點埋手；而佢嘅大作有龍蝦、蘆筍等名貴食材，艾拉口口聲聲話用心去煮，不過睇賣相，都係浪費居多。
好在電視台都知班球員有姿勢冇實際，搵嚟曼聯總廚高莫斯喺身邊協助，如果唔係，隨到好似之前三色台搞嘅美女廚房咁，有地獄廚神煮嘢煮到廚房着火咁騎呢。高莫斯更話，會安排評判試食同畀分，嚟緊嘅嘉賓有名宿笠臣、艾雲，甚至費Sir都會親自落廚。
費Sir落廚有賣點
男人老狗落廚，傷害性就唔會好大，我反而擔心節目搵其他球員做評判，萬一食到啲嘢唔生唔熟，搞到屙嘔肚痛，就無端端唔落得場，反而益咗利物浦。我係費Sir嘅話，邊個球員扭計唔續約，就安排佢做評判，屙到佢哋腳仔軟，仲邊有力跳草裙舞呀。
想睇艾拉下廚嘅宣傳片，請瀏覽：
http://www.manutd.com/default.sps?pagegid=%7BB4CEE8FA%2D9A47%2D47BC%2DB069%2D3F7A2F35DB70%7D&newsid=6616456
