呢排〈早飛倉〉持續頹勢，真係要向廣大讀者講sorry，周日畢傑精心挑選維爾瓦W，領先一球兼多打一個，竟然都畀艾美利亞迫和，真慘情。另外推介條過關4串1，基達菲又係領先之下被迫和斷尾關；不過我應承你哋，今次揀嘅韋斯咸下盤好有信心，希望幫本欄轉運。
米堡讓唔起勢轉平手
周三呢場米杜士堡主場對韋斯咸，係英足盃重賽；米堡呢排有幾沉，相信唔使我多介紹，聯賽14場不勝，跌到尾二，再唔搶番啲分，下季英冠再見。或者大家擔心，呢支神經刀盃賽竟然表現出眾，上仗作客淘汰英冠前列球隊狼隊，已經叫人跌眼鏡，不過我認為只係假象，因為狼隊嗰場收起好多主力，擺明爭升班好過爭盃；第5圈作客韋斯咸，只係把握對手一次失誤領先，下半場已經畀韋咸圍攻，韋咸未能反勝已經唔抵。
今次米堡有主場之利，莊家技術性調低番佢啲賠率，但主W有2.4倍，不過足智彩開米堡讓平/半，已經怪怪哋，韋咸受讓平/半只得1.75倍，相信臨場轉平手機會好大，有得受讓趁早買唔怕蝕。韋咸上仗畀保頓擊敗，但過程並不失禮，甚至有權追和2:2。以韋咸聯賽作客阿仙奴、車路士都唔使輸，上圈作客哈特普爾輕鬆贏2:0晉級；已經充分證明韋咸打作客唔似上季咁差。如果嫌1.75倍下盤冇肉食，個人對2.68倍客W都好有信心，補埋個9.5倍韋咸贏2:1波膽就更good。
熱刺放棄歐協盃
周四又有歐協盃，上仗貼史特加「客勝」失手，今次唔追嘞，反而博熱刺對呢個盃採放棄態度，要薩克達作客和波。熱刺首回合已輸0:2，次回合反先機會不大，周日更有英聯盃決賽鬥曼聯，你係哈利列納都知邊場重要啲啦！
牽牛
早飛王貼士
星期三6米杜士堡vs韋斯咸
首選：韋斯咸（下）
次選：韋斯咸勝（2.68）
冷選：韋斯咸勝2:1（9.5）
早飛倉
主菜：星期三6韋斯咸（下）（1.75）@1,500
渾水摸魚過關：星期三6韋斯咸勝（2.68）x
星期四16熱刺和（3.3）2x1@500
今日早餐價錢：-$2,000
上日賺蝕：-$2,000
早飛倉結餘：$81,564
規則：$100,000本錢，每日買早報最多動用$5,000，最少$1,000，逢周二、五見報。
周中焦點
星期三2
皇家馬德里vs利物浦
皇馬由拉莫斯執教後煥然一新，取得聯賽9連勝，利物浦雖剛於聯賽失分，但今仗料有謝拉特復出。而兩軍同由西班牙人領軍，拉莫斯鬥賓尼迪斯亦充滿睇頭。
星期四7
AC米蘭vs雲達不來梅
AC米蘭在意甲聯失分甚多，歐協盃已幾乎是他們捧盃最後機會，首回合作客賽和雲達不來梅1:1，有一個作客入球在手，教練安察洛堤又會否用龜縮戰術呢？