早排有年輕人公開要求鬍鬚曾聽日公佈財政預算案時，率領一眾高官帶頭減薪，同市民共度時艱，結果當然慘食鬍鬚曾檸檬。可能大家都知𠵱家叫政府做嘢難過乜，求政府不如求神，多個基督教同天主教團體決定今晚7點半，喺中環立法會門外（近皇后像廣場）搞個祈禱會，期望天主能夠賜啲力量畀鬍鬚曾，等佢聽日公佈份財政預算案時，能夠真正關顧喺金融海嘯下，生活百上加斤嘅基層勞工同家庭。據八方聽聞，今晚祈禱會活動好豐富，包括唱詩、讀經、民間團體分享，嘉賓仲包括陳日君樞機同甘浩望神父，希望鬍鬚曾聽日去立法會時會醒定啲啦。