民建聯福將蔡菜子立法會選舉飲恨，只可以保送曾鈺成重返議會；阿曾成功冧莊後唔只做埋主席，仲覓得第二春，運氣好到冇人有。阿曾家陣咁幸福，原來要多謝蔡菜子，因為玄學家楊天命一早幫蔡菜子算過，話佢嘅運氣會被排同一張名單參選嘅阿曾吸走；最慘係連蔡菜子本應呢兩年出現嘅桃花運，都一併過埋畀阿曾。𠵱家事實證明，蔡菜子嘅運氣真係被阿曾吸亁吸淨，變咗菜亁子。
靜待桃花唔會送上門
失去議席事少，冇咗真命天子事大。蔡菜子噚日自爆，楊天命曾經幫佢同阿曾夾過時辰八字，留下「成也曾鈺成、敗也曾鈺成」十隻大字。據楊師傅講，如果嗰期蔡菜子運氣好當旺，會將阿曾嘅好運吸埋過嚟；相反，如果係阿曾當旺嘅話，佢就會吸走蔡菜子嘅運氣，總之兩個人都非常受對方影響。
蔡菜子話，據佢所知，早前佢運氣唔夠好，所以相信阿曾吸走咗佢剩餘嘅好運。不過，無論阿曾重返議會有冇靠佢呢啲好運，蔡菜子都唔會上心，願選服輸，心甘命抵，前主席可以繼續留喺議會，佢都一樣好開心。反而佢最關心嘅係：自己嘅未來情人，係咪就喺嗰段時間畀阿曾吸走埋？
原來楊師傅算過，蔡菜子呢一、兩年會行桃花運，渴望脫離單身行列嘅蔡菜子本來諗住靜心等待，但等咗一陣都唔見有乜花仔喺佢身邊出現，相反阿曾就忽然大地回春，冧莊當選之餘又覓到人生第二春，難怪蔡菜子質疑，係咪連自己嘅桃花運都畀阿曾搶走埋呢？係嘅話，阿曾就真係要多謝佢喎。
講開又講，蔡菜子話選舉期間，唔覺阿曾有人嚟探班送湯，唔知阿曾係咪選舉後先同佢位第二春撻着？八方認為，就算桃花運俾吸走，蔡菜子都可以主動出擊，周圍搵吓有冇心儀對象㗎？但蔡菜子堅持以不變應萬變，只會等待桃花來敲門，唔會主動送上門喎。
不過，凡事應該往好嘅方面諗。過往排喺蔡菜子前面參選嘅男士，例如程介南同馬力，運程都麻麻；今次阿曾好運不斷，大概都可以幫蔡菜子嚟個大平反，一洗佢多年委屈。
mailto:[email protected]