上屆落選嘅立法會議員特別多，會計界譚香文係其中一位，但原來落咗車唔代表悠閒啲，事關譚香文Mandy仍然舉動多多，除咗專注佢嘅稅務工作，亦同唔少友好搞慈善活動，最近就答應出任非牟利組織「意外之友」嘅名譽主席，為工傷、車禍等意外嘅死傷者提供一站式支援。
睇見名譽兩個字，大家可能以為Mandy只係掛個名冇乜嘢做，但原來呢個名譽主席唔只得個名咁簡單，因為Mandy除咗要幫呢個組織搵辦事處，仲要幫手揼人心口籌錢，真係責任重大。噚日「意外之友」舉行成立典禮，Mandy仲搵埋另一位落選老友記郭家麒到場支持，認真係患難見真情。