係咪2017年有普選，𠵱家仲係未知之數。旗幟鮮明要為普選作戰到底嘅丐幫社民連，為咗進行持久抗爭，正物色永久會址做抗戰指揮中心。其實搬竇仲有另一個好處，因為佢哋位於尖沙嘴嘅總部單位由江湖人士持有，成日招人非議，搬去第二度就唔使成日俾人話。
要買單位當然先要有錢，所以佢哋今年會舉行連串籌錢活動，頭炮係噚日喺山頂步行籌款，有過百會員參加，而且成績理想，大嚿陳偉業話啲街坊夾夾埋埋都捐咗十幾萬畀佢哋，稍後會繼續再搞其他活動募捐，例如慈善晚會同嘉年華會，希望善款源源不絕。但噚日咁啱路經山頂嘅大導演杜琪峰就請佢哋食檸檬，現場中人爆料話杜sir掂行掂過走咗去。