維珍航空老闆李察．布蘭信（RichardBranson）向來出位破格，噚日佢旋風式訪問香港，都特別玩嘢，只逗留個幾鐘。原來佢最近除公開向全美航空挖角，話要用雙倍人工挖走嗰位將故障客機安全急降紐約哈德遜河、救番百幾條人命嘅英雄機師之外，又搞咗個全球「複製布蘭信」比賽，搵最似自己嘅人。佢仲同八方講，有創意，就算錯咗都唔使怕被炒。咁打工仔就要即刻啓動負責創意嘅右腦，保住個飯碗。
多橋之道容許犯錯
布蘭信噚日展開八日環球之旅，慶祝維珍25周年，第一站嚟咗香港。佢傍晚5點幾喺機場禁區出現，吸引大批旅客圍觀同影相。大忙人原來好精打細算，極速開咗個記者會，又超極速咁同三間電子傳媒、一份報紙做訪問。有幾急？四個訪問，最長10分鐘、最短4分鐘！
為宣傳佢個「複製布蘭信」比賽，噚日總共有11個布蘭信現身香港機場，一個係真身，其餘十個係假扮。但八方睇極，呢批複製人同真身嘅相似度平均唔夠五成，玩法好簡單，任何人只要生得似或者扮得似布蘭信，都可以參賽。挑選冇準則，布蘭信話似就得。佢話要搵個年輕啲又靚仔啲嘅布蘭信取代自己，等佢可以退休去小島嘆世界喎。參加者只要拍條片放喺設於facebook嘅平台（ http://www.facebook.com/virginatlantic），贏咗就有張來回機票，同去紐約參加維珍25周年派對。
布蘭信係第一個高調發展太空旅遊嘅商人，創立維珍銀河（VirginGalactic），仲有架太空船二號準備2010年升空，又打算2016年搵班人遠征火星。創意同諗法永遠先人一步嘅布蘭信噚日同八方講，佢多橋之道，係容許員工犯錯。
佢話，做生意就好似畫一幅圖畫，呢幅畫要有好多顏色、要好新穎先至吸引到人去睇。色彩就係嚟自員工嘅諗頭，所以幫佢打工嘅人，可以去冒險、去犯錯，絕對有免於被炒嘅自由。佢又話，𠵱家嘅後生仔唔睇報紙，主要靠互聯網知天下事。所以「複製布蘭信」比賽，都揀facebook做平台。仲喺報紙打工嘅八方，聽到惟有一邊滴汗一邊同佢握手saygoodbye。
mailto:[email protected]