金融海嘯為全球帶嚟唔少冲擊，噚日華華喺新華網睇到佢哋引述美國《外交政策》月刊嘅一篇文章，講咗13個海嘯嘅「意外副作用」，華華揀咗幾個得意嘅同大家分享吓。
首先係經濟雖然差，但經濟危機研討會就好吃香，好似有新「末日博士」之稱嘅魯賓尼，呢幾個月馬不停蹄咁遊勻倫敦、蘇黎世同莫斯科等地出席研討會，忙到分身不暇。但經濟差咗，相信佢未來亦要改變吓，至少搭飛機出訪，怕且要改坐經濟客位啦！
過往唔少年輕才俊都諗住喺華爾街賺大錢，創一番事業，但時移世易，一向有「鐵飯碗」之稱嘅政府公務員，成為大家爭相競奪嘅「筍工」。其實情況又點只係外國，香港𠵱家都有唔少人爭崩頭搶住打政府工。
政府工多人搶
一場海嘯捲走唔少人嘅退休金，令佢哋推遲退休計劃，要繼續捱騾仔。而等住呢班人「退位讓賢」嘅後生仔就晉升無望，搞到辦公室政治更加慘烈。